* kal aur aaj *

maazee kaa koii khayaal aksar
meree tanhaayee aur
meree veeraanee
ko cheertay huve
tezee se dauR jaataa hai 
aur
meray khaamosh lamhoN meiN
aik shor machaa jaataa hai.
waqt waqt kee baat hai !
kal tak
maiN unhee khayaaloN kee
train par sawaar thee,
ik hamsafar bhee suNg thaa
manzil kee justajoo bhee thee,
magar aaj
na koii hamsafar hee saath hai
na hee kisee safar par hooN maiN
buss...
apnee veeraan zindagee ke
platform par tanhaa khaRee
maazee ke khayaaloN ko
aksar dauRtay bhaagtay
dekhtee hooN.
na kisee manzil kee
mujhe talaash hai
na hee koii manzil
meree muntazir hai.