Zawar Shah "Zair"
Doha, Qatar

umr ka haasil tha jo kuchh khho diya paane ke baad
aaNkh bhar aayi meri dil ko samjhaane ke baad 

maiN ne aangan meN lagaaya paiRh tha saaye ko magar
uss ne deewaareN gira diN parwarish paane ke baad

ishq jaisa kaar-e-naaqas hai mere gham ka sabab
maiN buhat hi muskraaya aankh bhar aane ke baad

ham ne daikha hai khushi se raqs karte "gard" ko
apne chahre pe tera ik naksh-e-paa paane ke baad

daanay-e-gandam meN jaane kya nasha hai ai khuda
aadmi sab bhool jaata hai isse khaane ke baad

kya haal hai zaayer tumhaara kaise ho tum in dinoN?
poochhne woh mujh se aaya dil ke luT jaane ke baad