Zafar Hamidi
India

choom looN Terey aastaaN ki garD
lag rahi hai woh kahkashaaN ki garD

uR rahi hai abhi KhazaaN ki garD
imtehaaN maiN hai gulsitaaN ki garD

DoorbeeN se nazar To aa na saki
kisi sooraT bhi aasmaaN ki garD

hai hamarey Khameer maiN shamil
saarey aafaaq-e-bekaraaN ki garD

par farishToN ka jal hi jaey jahaaN
meri muthi maiN hai wahaaN ki garD

har gali maiN abhi hai bikhri hui
merey maazi ki daastaaN ki garD

DosTo aaj bhi mujhe azeez hai
sirf aur sirf hindustaaN ki garD

ai ZAFAR ban gai faseel apni
Khud m'eri sayy-e-raaegaaN ki garD