Mohammed Moinuddin
Chennai,india

sochoN pe jami gard ko lafzoN meiN chHupa kar
    kartey haiN pesh ghazal ke ash'aar bana kar.

hai dil pe siyeh kari ki gard teh be teh jami
    aur tan hai rakHa ujley libadey meiN chHupa kar.

 KhaNda be lab haiN jo bHi wohi log dosto
     miltey haiN galey,baG'l meiN KhaNjer ko chHupa  kar.

  aalooda aur ho gaya miTTi ka yeh badan
      gard-e- guneh se dil ko daGhdar bana kar.

   woh log jo haiN mazhabi yerqaan ka shikar
      pHirtey haiN ta'assub ka siyeh chashma laga kar.

   pHirta hai dar be dar shakeel-e-sooKhta samaaN
      dil meiN kisi ke pyaar ki chingaari chHupa kar.