Meenakshi Jha
Sydney

gard aaNkh se haTaa kar dekheN
ranj diloN se miTaa kar dekheN.

fasl nafrat kee botay rahay ab tak
phool pyaar ke khilaa kar dekheN.

aao sehar-e-aman-o-chain kee simt 
qadam do chaar baRhaa kar dekheN.

taa-umr haq apnay maaNgtay rahay
kabhee haq apnay adaa kar dekheN.

anaa se akDay aur uThay sir ko 
kyoN na ik  baar jhukaa kar dekheN.

vaadaa kar ke unheN toDtay rahay
koii vaadaa ab ke nibhaa kar dekheN.

baarood aur bomb peh jo luTaayee daulat
bhukhmaree us se miTaa kar dekheN.

haath uThtay rahe dushmanee ke liye
unheN dostee se milaakar dekheN.